ரஷ்யாவிடமிருந்து பிரித்தானியாவுக்கு அச்சுறுத்தல் ஏற்படும் பட்சத்தில், மீண்டும் பிரித்தானிய இராணுவத்தில் இணைந்து தனது நாட்டுக்காகப் பணியாற்றத் தயாராக இருப்பதாக பிரித்தானிய இளவரசர் ஹரி தெரிவித்துள்ளார்.
யுக்ரைனுக்கு விஜயம் மேற்கொண்டிருந்தபோது, பிரித்தானியாவின் The Daily Telegraph நாளிதழுக்கு வழங்கிய நேர்காணலிலேயே அவர் இதனைக் குறிப்பிட்டுள்ளதாக சர்வதேச ஊடகங்கள் செய்தி வெளியிட்டுள்ளன.
தேவை ஏற்படும் பட்சத்தில், முன்னாள் இராணுவ வீரர்கள் மற்றும் தற்போதைய பாதுகாப்புப் படையினருடன் இணைந்து, 100 சதவீத அர்ப்பணிப்புடன் நாட்டுக்காகப் பணியாற்றத் தயாராக இருப்பதாக இளவரசர் ஹரி வலியுறுத்தியுள்ளார்.
மேலும், பிரித்தானியா மற்றும் ஐரோப்பாவுக்கு ரஷ்யாவினால் ஏற்படும் அச்சுறுத்தல் கடந்த 15 ஆண்டுகளாகத் தொடர்ந்து வருவதாகவும் அவர் சுட்டிக்காட்டியுள்ளார்.
நேரடியாக ஏவுகணை அல்லது ஆளில்லா வானூர்தித் தாக்குதல்கள் இடம்பெறவில்லை என்பதற்காகப் போர் அச்சுறுத்தல் இல்லை எனக் கருத முடியாது எனவும் அவர் தெரிவித்துள்ளார்.
கடந்த ஒரு தசாப்த காலமாகப் பிரித்தானியா ரஷ்யாவுடனான மோதல் சூழ்நிலையில் இருந்து வருவதாகத் தாம் நம்புவதாகவும் இளவரசர் ஹரி மேலும் குறிப்பிட்டுள்ளார்.




