Tuesday, 17 November 2026
கனடா வானிலை
12°C
ரொறன்ரோ
தெளிவான வானம்
  • உணர்வு 8°
  • ஈரப்பதம் 69%
  • காற்று 17 km/h
  • ஸ்காபரோ 12°
  • மார்க்கம் 13°
  • பிரம்டன் 12°
  • மிசிசாகா 12°

கனடாவின் தமிழ்க் குரல் – தமிழ் செய்திப் பத்திரிகை

நாணய மாற்று விகிதம் CAD
  • USD 1.43 • 0.00%
  • EUR 1.57 • 0.00%
  • GBP 1.89 • 0.00%
  • CHF 1.70 • 0.00%
  • AUD 0.96 • 0.00%
  • 1 CAD → LKR 232.69 • 0.00%
  • 1 CAD → INR 65.70 • 0.00%
  • AED 0.39 • 0.00%
புதுப்பிப்பு: 2026-11-17 17:01
அண்மைச் செய்திகள்
ரோசரி மணியால் கண்ணில் அடிபட்ட போப்பாண்டவர், மன்னிப்பு வழங்கினார்! உலக அதிசய பட்டியலில் தஞ்சை பெரிய கோவில்? ‘போர்களை முடிவுக்கு கொண்டு வர வேண்டும்’ – இந்திய பிரதமர் வலியுறுத்து ஹோர்முஸ் நீரிணையில் எண்ணெய் கசிவுகள் – சுற்றுச்சூழல் அபாயம் குறித்து எச்சரிக்கை ‘ஈரானுடன் இன்று சந்திப்பு நடைபெறும்’ – கட்டார் அதிகாரி தெரிவிப்பு சிலாபத்தில் கோர விபத்து! ஸ்பெயின் நாட்டைச் சேர்ந்த மூன்று பெண்கள் காயம் யாழில் சிறீதரன் எம்.பியை நேரில் சந்தித்துக் கலந்துரையாடிய தொல்.திருமாவளவன்! உயிருக்கு ஆபத்து ஏற்படலாம் – அவசர மருத்துவ சிகிச்சை கோரும் இம்ரான் கான்! தென்னாப்பிரிக்காவில் இருவேறு துப்பாக்கிச் சூட்டு சம்பவங்கள் – 17 பேர் உயிரிழப்பு! மும்பை வீதியில் கிரிக்கெட் விளையாடி அசத்திய பிரித்தானிய இளவரசர் தம்பதி!
விளம்பரம்விளம்பரம்
உலக செய்திகள்

சீன – ரஷ்ய வர்த்தகக் கூட்டும் சிதறும் மேற்குலக ஒற்றுமையும்! புதிய புவிசார் அரசியல் ஒழுங்கின் விளிம்பில் உலகம்!

சீனாவின் தொழில்நுட்பத் தலைநகரான ஷென்சென்னில் இம்மாதம் 18 மற்றும் 19 ஆகிய திகதிகளில் நடைபெறவுள்ள APEC எனப்படும் ஆசிய-பசிபிக் பொருளாதார ஒத்துழைப்பு உச்சிமாநாடு, வெறுமனே ஒரு வர்த்தகக் கூட்டமாக அன்றி, உலக அரசியலின் அதிகாரச் சமநிலையை மாற்றியமைக்கும் ஒரு வரலாற்றுத் திருப்புமுனையாக நோக்கப்படுகிறது. 

உலகப் பொருளாதாரத்தில் சுமார் அறுபது சதவீதப் பங்களிப்பைக் கொண்ட இருபத்தொரு உறுப்பு நாடுகளின் தலைவர்கள் கூடும் இம்மாநாட்டின் மிக முக்கிய சிறப்பம்சம், அமெரிக்க ஜனாதிபதி டொனால்ட் ட்ரம்ப், சீன ஜனாதிபதி ஷி ஜின்பிங் மற்றும் ரஷ்ய ஜனாதிபதி விளாடிமிர் புட்டின் ஆகிய மூவரும் ஒரே மேசையில் அமர்ந்து நடத்தவுள்ள வரலாற்றுச் சிறப்புமிக்க முத்தரப்புப் பேச்சுவார்த்தையாகும். 

மேற்குலகின் வர்த்தகத் தடைகளுக்கும் பாதுகாப்புவாதத்திற்கும் எதிராக, ஆசிய-பசிபிக் தடையற்ற வர்த்தகப் பகுதியை முன்னெடுப்பதன் ஊடாகத் தனது பொருளாதார மற்றும் இராஜதந்திர ஆளுமையை உலகிற்குப் பறைசாற்றச் சீனா இம்மாநாட்டைப் பயன்படுத்திக் கொள்கின்றது. 

இம்மாநாட்டின் பின்னரான புவிசார் அரசியல் சூழல், இரண்டாம் உலகப் போருக்குப் பின்னர் நிலவிய அமெரிக்கத் தலைமையிலான ஒற்றைத் துருவ உலக ஒழுங்கிற்கு முற்றுப்புள்ளி வைத்து, பன்முகத் துருவ உலக ஒழுங்கை நோக்கி நகரும் என கணிக்க முடியும். 

அமெரிக்காவில் அண்மையில் நடந்து முடிந்த இடைத்தேர்தலில் ஜனாதிபதி ட்ரம்பின் குடியரசுக் கட்சி பாரிய தோல்வியைச் சந்தித்து, பிரதிநிதிகள் சபை மற்றும் செனட் சபை ஆகிய இரண்டையும் ஜனநாயகக் கட்சியிடம் இழந்துள்ளமை வோசிங்டனின் உலகளாவிய பிடியைப் பலவீனப்படுத்தியுள்ளது. 

உள்நாட்டில் ஏற்பட்ட இந்த அரசியல் பின்னடைவும், ஈரான் போரினால் ஏற்பட்ட பொருளாதார நெருக்கடிகளும், இஸ்ரேலில் பெஞ்சமின் நெதன்யாகு அரசாங்கம் பெரும்பான்மையை இழந்துள்ளமையும் அமெரிக்காவை வெளிநாட்டுக் கொள்கைகளில் சமரசம் செய்யத் தூண்டியுள்ளன. 

இந்த இராஜதந்திர வெற்றிடத்தைப் பயன்படுத்தி, சீனாவும் ரஷ்யாவும் இணைந்து உலகளாவிய வர்த்தக விதிகள் மற்றும் பாதுகாப்புக் கட்டமைப்புகளில் தமது ஆதிக்கத்தை நிலைநாட்ட முனைகின்றன. 

இந்த அதிகார மாற்றத்தின் நேரடித் தாக்கத்தை ஐரோப்பிய ஒன்றியமும் அமெரிக்காவும் எதிர்கொள்ளவுள்ள எதிர்கால உறவுகளில் தெளிவாகக் காணலாம். 

ட்ரம்பின் இடைத்தேர்தல் தோல்வி ஐரோப்பியத் தலைநகரங்களுக்குச் சற்று ஆறுதலை அளித்திருந்தாலும், அமெரிக்காவிற்கும் ஐரோப்பாவிற்கும் இடையிலான பிளவுகள் ஆழமானவை. 

உள்நாட்டு அரசியலில் ஜனநாயகக் கட்சியின் கட்டுப்பாடுகளுக்குள் சிக்கியுள்ள ட்ரம்ப், தனது நிறைவேற்று அதிகாரத்தைப் பயன்படுத்தி ஐரோப்பிய ஒன்றியத்தின் மீது புதிய வர்த்தக வரிகளைச் சுமத்தக்கூடும் என பிரஸ்ஸல்ஸ் அஞ்சுகின்றது.

குறிப்பாக, யுக்ரைன் போர் விவகாரத்தில் ஐரோப்பாவையும் யுக்ரைனையும் தவிர்த்துவிட்டு, ட்ரம்பும் புட்டினும் ஷி ஜின்பிங்கின் முன்னிலையில் இரகசிய உடன்படிக்கைகளுக்கு வரக்கூடும் என்ற அச்சம் ஐரோப்பிய நாடுகளைப் பெரிதும் வாட்டுகின்றது. 

1945 ஆம் ஆண்டு யால்டா மாநாட்டில் வல்லரசுகள் ஐரோப்பாவைப் பங்குபோட்டதைப் போல, ஷென்சென் மாநாட்டிலும் தமது நலன்கள் பலிகொடுக்கப்படலாம் என ஐரோப்பா கருதுகின்றது. 

இதன் விளைவாக, அமெரிக்காவை மட்டுமே நம்பியிருக்காமல், தனது சொந்தப் பாதுகாப்புக் கட்டமைப்பை வலுப்படுத்தவும், ஆசிய நாடுகளுடன் புதிய வர்த்தகக் கூட்டணிகளை உருவாக்கவும் ஐரோப்பிய ஒன்றியம் நிர்ப்பந்திக்கப்பட்டுள்ளது.

இதேவேளை, இந்த மாநாட்டில் இந்தியா உறுப்பினராக இல்லாவிட்டாலும், புதுடில்லி சீனாவின் ஷென்சென் நகரில் நடைபெறும் ஒவ்வொரு நகர்வையும் மிக உன்னிப்பாக அவதானித்து வருகின்றது. 

1998-ஆம் ஆண்டு முதல் புதிய உறுப்பு நாடுகளைச் சேர்ப்பதற்கு விதிக்கப்பட்டுள்ள தடையாலும், உள்நாட்டு வர்த்தகப் பாதுகாப்புக் கொள்கைகளாலும் இந்தியா இக்கூட்டமைப்பில் இணையவில்லை. 

இருப்பினும், சீனாவின் தலைமையில் உருவாக்கப்படும் ஆசிய-பசிபிக் தடையற்ற வர்த்தக ஒப்பந்தங்கள் மற்றும் செயற்கை நுண்ணறிவு, விநியோகச் சங்கிலி தொடர்பான முடிவுகள் இந்தியாவின் ஏற்றுமதி மற்றும் தொழில்நுட்ப வளர்ச்சியில் நேரடித் தாக்கத்தை ஏற்படுத்தும் என்பதே இந்தியாவின் கவலைக்குக் காரணமாகும். 

குறிப்பாக, ட்ரம்பும் ஷி ஜின்பிங்கும் வர்த்தகப் போரை முடிவுக்குக் கொண்டுவரும் வகையில் ஓர் உடன்படிக்கைக்கு வந்தால், சீனாவை எதிர்கொள்ள அமெரிக்கா இந்தியாவிற்கு வழங்கி வந்த இராஜதந்திர முக்கியத்துவம் குறையக்கூடும் எனப் புதுடில்லி கருதுகின்றது. 

இதனைச் சமநிலைப்படுத்தவே, மாநாட்டிற்கு சற்று முன்னதாக அமெரிக்கா, ஜப்பான், தென் கொரியா ஆகிய நாடுகளுடன் இணைந்து செமிகண்டக்டர் மற்றும் அரிய கனிமங்களுக்கான விநியோகச் சங்கிலி ஒப்பந்தத்தில் இந்தியா கைச்சாத்திட்டுள்ளதுடன், கிழக்காசிய உச்சிமாநாட்டின் ஓரத்தில் ‘குவாட்’ கூட்டமைப்பையும் வலுப்படுத்த முயல்கின்றது.

மொத்தத்தில், ஷென்சென் மாநாடு முடிவடையும் போது, பழைய கூட்டணிகள் சிதைந்து, புதிய புவிசார் அரசியல் சமன்பாடுகள் உருவாவதை உலகம் தவிர்க்க முடியாமல் எதிர்கொள்ளும். 

ஆகவே, ஷென்சென் மாநாடு சீனாவிற்குக் கிடைத்துள்ள மிகப்பெரியதோர் இராஜதந்திர வெற்றியாகப் பதிவாகும் அதேவேளை, இந்தோ-பசிபிக் பிராந்தியத்தில் சீனாவை ஒரு நேரடி எதிரியாகப் பார்ப்பதைத் தவிர்த்து, இணக்கமான போக்கைக் கடைப்பிடிக்க வேண்டிய ஒரு கட்டாயப் பின்னணி இந்தியாவிற்கு உருவாகி வருகின்றது. 

அமெரிக்காவின் உள்நாட்டு அரசியல் நெருக்கடியும், ட்ரம்ப்-ஷி-புட்டின் ஆகியோரின் முத்தரப்பு நெருக்கமும் புதுடில்லியை தனது வெளியுறவுக் கொள்கையில் புதிய சமநிலைகளைத் தேடத் தூண்டியுள்ளன. 

இந்தப் புதிய புவிசார் அரசியல் மாற்றம் இலங்கையின் அநுர குமார திசாநாயக்க அரசாங்கத்திற்குச் சாதக, பாதகங்களை உள்ளடக்கிய ஒரு நுட்பமான சவாலாகவே அமைகின்றது. 

ஒருபுறம், பொருளாதார நெருக்கடியிலிருந்து மீண்டு வரும் இலங்கைக்கு, சீனாவின் தடையற்ற வர்த்தகக் கொள்கைகளும் முதலீடுகளும் பாரிய சாதகமாக அமைவதுடன், அமெரிக்காவின் அழுத்தங்கள் குறைவதும் கொழும்பிற்குச் சற்று ஆசுவாசத்தைத் தரும். 

ஆனால் மறுபுறம், பிராந்தியத்தில் சீனாவின் கை ஓங்கும் போது, இந்தியாவும் சீனாவும் தமக்கிடையிலான போட்டியைக் குறைத்துப் புதிய இணக்கப்பாடுகளுக்கு வந்தால், இரு வல்லரசுகளையும் சமநிலைப்படுத்திப் பேரம் பேசும் இலங்கையின் இராஜதந்திர வியூகம் பலவீனமடையக்கூடும் என்பதுடன், இந்தியாவின் பாதுகாப்பு அக்கறைகளைப் புறக்கணிக்க முடியாத நெருக்கடியும் அநுர அரசாங்கத்திற்குத் தொடர்ந்தும் நீடிக்கும்.