'சர்வகட்சி அரசில் இணைவதென்றால் இதனை செய்யவேண்டும்'

Admin
Aug 23,2022

எங்களது கோரிக்கைகள் நடைமுறைப்படுத்தப்படாவிட்டால் நாம் ஒருபோதும் இந்த அரசாங்கத்துக்கு ஆதரவு தரமாட்டோம் என தமிழ்த் தேசியக் கூட்டமைப்பின் நாடாளுமன்ற உறுப்பினர் செல்வம் அடைக்கலநாதன் தெரிவித்துள்ளார்.

வவுனியாவில் இடம்பெற்ற நிகழ்வொன்றின் பின்னர் ஊடகங்களுக்கு கருத்து தெரிவிக்கும் போதே இவ்வாறு தெரிவித்துள்ளார்.

அவர் மேலும் கருத்து தெரிவிக்கையில், “ஏற்கனவே நாங்கள் பயங்கரவாத தடைச்சட்டத்தை நீக்க வேண்டும் என்று கூறியிருக்கின்றோம்.

தொடர்ச்சியாக பயமுறுத்தலும் இந்த பயங்கரவாத தடைச்சட்டத்தை வைத்துகொண்டு பல இளைஞர்களை கைது செய்வதும் தொடர்ச்சியாக நடைபெறுகின்றது.

எங்களை பொறுத்தமட்டில் ஜனாதிபதிக்கும் கோரிக்கைகளை முன் வைத்திருக்கின்றோம். பயங்கரவாத தடைச் சட்டத்தை உடனடியாக நீக்க வேண்டும்.

முக்கியமான விடயங்கள் வருகின்ற போது நிச்சயமாக நாங்கள் அவருக்கு ஆதரவளிக்க முடியாது என்பதனை குறிப்பிட விரும்புகின்றேன்.

தொடர்ச்சியாக தமிழர் தரப்பிலே கைது செய்யப்படுகின்ற நிலைமைகளும் கூடுதலாகவே காணப்படுகின்றது. இந்த விடயத்தை உடனடியாக நிறுத்த வேண்டும்.

நாங்கள் முன்வைத்த கோரிக்கைகளை உடனடியாக நடைமுறைப்படுத்துகின்ற செயற்பாட்டை ஜனாதிபதி செய்ய வேண்டும். இல்லையென்றால், எங்களுடைய ஆதரவு இந்த அரசாங்கத்துக்கு ஒருபோதும் இருக்காது.
அரசியல் கைதிகள் விடுதலை செய்ய நடவடிக்கை

எங்களை பொறுத்தமட்டிலே எங்களுடைய கோரிக்கையில் முதலாவது அரசியல் கைதிகள் விடுதலை செய்ய வேண்டும். பயங்கரவாத தடை சட்டத்தை எடுக்க வேண்டும்.

இந்த கோரிக்கைகளை நடைமுறைப்படுத்துகின்ற வாய்ப்புக்குள் வருகின்ற நல்ல விடயங்களை ஆதரித்து இடைஞ்சலாக வருகின்ற விடயங்களை எதிர்க்கின்ற ஒரு சந்தர்ப்பத்தை உருவாக்குவோம்.

ஆனால் எங்களுடைய கோரிக்கைகளிலே படிப்படியாக நிறைவேற்றுகின்ற செயற்பாடுகள் வர வேண்டும். இல்லை என்றால் நாங்கள் சிந்துத்துதான் முடிவெடுக்க வேண்டும்” என தெரிவித்துள்ளார்.